Կանադայի Վիկտորիա քաղաքում (Բրիտանական Կոլումբիա նահանգի մայրաքաղաքը, Վանկուվեր կղզի) ուսանողներ կան, որ ստիպված են ապրել վրաններում ու հարմարեցված ավտոմեքենաներում՝ բնակարանների բարձր վարձերի պատճառով, հայտնում է CBC NEWS-ը։
Նշենք, որ բուն Վիկտորիայում բնակվում է ավելի քան 80 հազար մարդ, մոտակա 12 բնակավայրերի հետ միասին՝ մոտ 380 հազար։
Մարտի 18-ի տվյալներով՝ քաղաքում ազատ բնակարանները մոտ 1 տոկոս են, որը երեք անգամ քիչ է Կանադայի միջին ցուցանիշից, իսկ բնակվարձերը վերջին 6 ամսում աճել են ավելի քան 20 տոկոսով։
Վիկտորիայի համալսարանի տնտեսագիտական ֆակուլտետի 3-րդ կուրսի ուսանող Դենիել Դրուրին ստիպված էր գնել 1994 թ. արտադրության Ford Econoline այն բանից հետո, երբ անցած աշնանը չկարողացավ բնակարան գտնել։
Նա իր ֆուրգոնը կանգնեցնում է հանրակացարանի մոտ (բակում չի թույլատրվում) ու կայանման համար վճարում է ամսական 75 դոլար։
Ռոբ Բալմերի վիճակն ավելի վատ է. նա մեկ տարուց ավելի գիշերել է վրանում, որպեսզի կարողանա սովորել Camosun College-ում ու նշում է, որ դա ապրելու բլորովին դյուրին տարբերակ չէ։
Բալմերի ամենաչսիրած հարցը «որտեղ եք ապրում»-ն է, քանի որ կոնկրետ հասցե չունենալով՝ հանդիպում է կասկածամիտ վերաբերմունքի։
Բալմերի ու Դրուրիի ճակատագիրն ունեն բազմաթիվ այլ ուսանողներ։
Վիկտորիայի համալսարանի The Martlet ուսանողական թերթի հոդվածագիր Ջալեն Կոդրինգտոնը CBC Radio-ին հայտնել է, որ լսել է մի քանի ուսանողական ճամբարների մասին։
«Եթե ուսանողը չի կարողանա իրեն թույլ տալ ապրել, որտեղ ցանկանում է, քանի դեռ սովորում է, դա նշանակում է, որ մենք իջել են ռեկորդային ցածր մակարդակի»,-ասել է նա։
Վիկտորիայի համալսարանի ներկայացուցիչ Դենիզ Հելմը նշել է, որ տեղյակ են, թե ինչ խնդիրների հետ են բախվում ուսանողները։
Կրթօջախի հանրակացարանն ունի 2100 տեղ, բայց դրանց մեծ մասը առաջին կուրսեցիների համար է նախատեսված։ Այժմ կառուցվում են 2 նոր մասնաշենք 621 ուսանողի համար։
Ի դեպ, տեղի օրենսդրությունն արգելում է գիշերել փողոցում կայանած տրանսպորտային միջոցներում։ Օրինախախտների մեքենաները քարշակելով հեռացնում են փողոցից։
Հանրակացարան չունեցող Camosun College-ի ներկայացուցիչը՝ Ռոդնի Պորտերը, նշել է, որ բնակարանային շուկան բարդացնոմ է բազմաթիվ ուսանողների կյանքը։
Ուսանողների աջակցման վարչությունն առցացն տվյալների բազա է վարում, որտեղ ուսանողները կապ են հաստատում տանտերերի հետ։
«Հանրակացարանի կառուցումը մեզ համար առաջնային նշանակություն ունի»,-ասել է նա՝ նշելով, որ ֆինանսավորում են փորձում գտնել այն կառուցելու համար։
«Ուսանողները պետք է ուսման վայրին մոտ մատչելի բնակարան ունենան, որպեսզի կենտրոնանան ուսման, այլ ոչ թե ֆինանսների վրա»,-ասել է քոլեջի ներկայացուցիչը։
Թրգմ.՝ Usanogh.am-ի