ՀՀ ԿԳՄՍ նախարարի տեղակալ Արաքսիա Սվաջյանը Հանրապետական մանկավարժահոգեբանական կենտրոնում (ՀՄԿ) հանդիպել է տարածքային մանկավարժահոգեբանական աջակցության կենտրոնների (ՏՄԱԿ) տնօրենների և ՀՄԿ անձնակազմի հետ, հայտնում են ԿԳՄՍՆ-ից։
Հանդիպման առանցքային թեման Լեռնային Ղարաբաղից բռնի տեղահանված երեխաներին հանրակրթության մեջ ներգրավումն ու նրանց մասնագիտական աջակցության ապահովումն էր։
Արաքսիա Սվաջյանն անդրադարձել է այս առնչությամբ ի հայտ եկած խնդիրներին ու դրանց հաղթահարման համար անհրաժեշտ միջոցներ ձեռնարկելու անհրաժեշտությանը։
Քննարկման ընթացքում ՏՄԱԿ-ների տնօրենները ներկայացրել են մանկավարժահոգեբանական աջակցության տրամադրման գործընթացի արդյունավետ կազմակերպման վերաբերյալ իրավիճակից բխող առաջարկություններ։
Հանդիպման ընթացքում քննարկվել են նաև ՀՄԿ-ի կողմից նախատեսվող հանրակրթական դպրոցների մանկավարժների և հոգեբանների համար վերապատրաստումների կազմակերպմանը վերաբերող մի շարք հարցեր։
Հիշեցնենք՝ Ադրբեջանը սեպտեմբերի 19-ին Արցախի դեմ լայնամասշտաբ հարձակում սկսեց՝ ամբողջությամբ զանգվածային հրետակոծության տակ առնելով Արցախը, այդ թվում՝ Ստեփանակերտը։
Հայկական կողմից կա առնվազն 200 զոհ և 400 վիրավոր։
Ադրբեջանական կողմի հետ բանակցություններից հետո որոշվեց զինաթափել Արցախի ՊԲ ստորաբաժանումները։
Սեպտեմբերի 24-ից սկսվեց արցախցիների զանգվածային տեղափոխությունը ՀՀ։
Սեպտեմբերի 28-ի առավոտյան հրապարակվեց Արցախի նախագահ Սամվել Շահրամանյանի հրամանագիրը, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ, մինչ այդ կլուծարվեն կառավարության ենթակայության բոլոր պետական հիմնարկները և կազմակերպությունները։
Վերջին տվյալներով՝ Արցախից բռնի տեղահանված անձանց թիվը կազմում է 100 632: Նրանցից շուրջ 30 հազարն անչափահասներ են, որոնցից 8 հազարը նախադպրոցական տարիքի, մնացածը` դպրոցական տարիքի երեխաներ են:
Հոկտեմբերի 5-ի տվյալներով՝ 6104 երեխա արդեն իսկ հաճախում է դպրոց։