Ձեռքսեղմում— 1.ոչ կրկեսային մահացու համար, 2.ժամանակակից տարբերակը՝ ոտքխփոցի կամ արմունկհպոցի
Դիմակ— 1.քթաբերանակալ պատնեշ՝ ընդդեմ վարակի, 2.«Նորաձեւություն-2020-ի» «Ձմեռ-գարուն» հավաքածուի պարտադիր բաղադրիչ
Ալկոգել— 1.արդեն նշանդրեքին կոնյակի փոխարեն դա են տանում, 2.ախտահանիչ նյութ, որը բոլոր խանութներում հենց նոր վերջացած է լինում
Սպիրտ— 1.չեղած տեղը՝ ալկոգել, 2.գնից դատելով՝ ոսկեջուր
Զուգարանի թուղթ— 1.նորօրյա պաշտամունքի առարկա, 2.ռուլետաձեւ փաթաթված թուղթ, որը կորոնաճգնաժամի օրերին վաճառվում էր մետրը 1 դոլարով
Կորոնավիրուս-վիրուսների «թագավոր ախպերը»
Հազ-թոքերի ցնցում, որի դեպքում թշնամական հայացքներից ավելի շուտ կարելի է մեռնել, քան ամենամահացու հիվանդությունից
Հեռահար ուսուցում— 1.դասախոս-ուսանող-ուսհաստատություն շղթայից երրորդ ավելորդին դուրս թողնելու միջոց, 2.դասավանդման անկոնտակտ-հարկադրված մեթոդ
Ինքնամեկուսացում— 1.պատժի տեսակ՝ ինքնաքննադատության եւ ինքնագնդակահարության միջեւ, 2.ինտրովերտների իրականացած երազանքը, 3.ընտանիքի անդամների հետ ծանոթանալու հնարավորություն
«Ֆեյսբուք»-Ցուկերբերգենց տղա Մարկի նվերն իր հայ ժողովրդին՝ ասել-խոսելու, բուժել-բուժվելու, ամուսնանալ-բաժանվելու, հեղինակավոր, թեկուզ՝ անհեղինակ կարծիք հայտնելու, նաեւ կենցաղային գործերի՝ ուղեղ լվանալու եւ գլուխ հարդուկելու համար
Comment here
Դուք պետք է մուտք գործեք՝ մեկնաբանությունը ուղարկելու համար։