ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր ներկա է եղել Խ. Աբովյանի անվան հայկական պետական մանկավարժական համալսարանի Վահան Թոթովենցի անվան թիվ 57 հիմնական դպրոցի «Վերջին դաս» միջոցառմանը, հայտնում են նախարարությունից:
ԿԳՄՍ նախարարը շնորհավորել է բոլոր շրջանավարտներին՝ նրանց մաղթելով հաջողություններ և նպատակների հետևից գնալու հաստատակամություն:
«Ձեր կյանքի հաջորդ փուլերում հիշե՛ք այն բոլոր կարևոր արժեքներն ու դասերը, որ այս տարիների ընթացքում սովորեցրել են ձեր ուսուցիչները: Անկախ դժվարություններից, խոչընդոտներից ու սխալներից, որոնք լինելու են, չհուսահատվեք. առանց դրանց՝ չեն ծնվում հաջողություններն ու հաղթանակները: Ավելի հաճախ լսեք ինքներդ ձեզ՝ հասկանալու, թե ինչի եք ուզում հասնել»,- ասել է ԿԳՄՍ նախարար Ժաննա Անդրեասյանը և շրջանավարտներին մաղթել հաջողություններ առաջիկա ավարտական և ընդունելության քննությունների ժամանակ։
![Ժաննա Անդրեսայան](https://www.usanogh.am/wp-content/uploads/2023/05/janna-andreasyan-verjin-zang.jpg)
Շրջանավարտներին մաղթելով բարի երթ՝ նախարարն ընդգծել է, որ դպրոցի ամենամեծ նվաճումը նրանց հետագա հաջողություններն ու նվաճումներն են․ «Վստահ եմ՝ տարիներ հետո լսելու ենք ձեր հաջողությունների մասին»։
Ժաննա Անդրեասյանը շնորհակալություն է հայտնել նաև ուսուցիչներին ու դպրոցի բոլոր աշխատակիցներին՝ ընդգծելով, որ դպրոցը մի ամբողջություն է, որտեղ յուրաքանչյուրն ունի իր կարևոր առաքելությունը:
Շրջանավարտներին շնորհավորել են նաև Խ. Աբովյանի անվան հայկական պետական մանկավարժական համալսարանի ռեկտոր Սրբուհի Գևորգյանը և Վահան Թոթովենցի անվան թիվ 57 հիմնական դպրոցի տնօրեն Նաիրա Տողանյանը։
Շրջանավարտներն իրենց կատարումներում հիշատակի խոսք են ուղղել Արցախյան վերջին պատերազմում զոհված հերոսների հիշատակին, շնորհակալություն հայտնել ուսուցիչներին և դպրոցին։
Նշենք, որ այս տարի Երևանի Վ․ Թոթովենցի անվան թիվ 57 հիմնական դպրոցն ավարտում է շուրջ 40 աշակերտ՝ 2 դասարանով:
ՀՀ դպրոցներում 2022-2023 ուստարում հիմնական դպրոցն ավարտում է շուրջ 35.300, իսկ 12-րդ դասարանը` 19.900 շրջանավարտ, Արցախում՝ 1141 աշակերտներ։
![«Վերջին զանգ»՝ Երևանի Վահան Թոթովենցի անվան թիվ 57 հիմնական դպրոցում](https://www.usanogh.am/wp-content/uploads/2023/05/verjin-zang-totovenci-anv-57-dproc2.jpg)