Արմավիրցիները փակել են ճանապարհն ու ոռոգման ջուր են պահանջում

Ոռոգման ջրի խնդիրը լուծելու պահանջով մի քանի ժամ է՝ դժգոհ գյուղացիները Հովտամեջ գյուղի մոտ փակել են Արմավիր-Երևան ճանապարհը:

«Արմենպրես»—ի հաղորդմամբ՝ նրանց խոսքով՝ մեկ շաբաթ է՝ ոռոգման  ջուրը կտրել են, և իրենք չեն կարողանում ջրել այգիներն ու բանջարաբոստանային մշակաբույսերը:

Գյուղացիները նշում են, որ վճարել են վարձերը, պարտք ու պահանջ չունեն, սակայն նման խնդրի առաջ են կանգնել:

Բողոքի ակցիայի մասնակիցներին մոտեցավ «էջմիածին» ՋՕԸ գործադիր տնօրեն Արամ Սարգսյանը, որն արդարացի համարեց նրանց հուզմունքը: «Երկու օր ջուր չկա, և պատճառը վթարն է: Մալաթիայի հատվածում հենց երեք օր առաջ վթար է եղել, որի հետևանքով ջուրը լցվում է բնակարաններ, մանկապարտեզներ: Երեք օր է՝ շինարարական աշխատանքներ են կատարվում: Մինչև օրվա վերջ կավարտվեն աշխատանքները, և ջուրը կլինի»,-հավատացրեց Սարգսյանը:

Բողոքի ակցիային մասնակցում են Արմավիրի մարզի տարբեր գյուղերի ներկայացուցիչներ: