Վրաստանի խորհրդարանը երկրորդ ընթերցմամբ դեմ է քվեարկել օտարերկրյա գործակալների մասին օրինագծին, որը Թբիլիսիում զանգվածային բողոքի ակցիաների պատճառ էր դարձել, հայտնում է «ՌԻԱ Նովոստի»-ն։
Խորհրդարանի կանոնակարգի համաձայն՝ առաջին ընթերցմամբ ընդունված օրինագիծը պաշտոնապես հետ կանչելու համար այն պետք է ձայների մեծամասնությամբ երկրորդ ընթերցմամբ չընդունվի։
Մարտի 7-ին Վրաստանի խորհրդարանն առաջին ընթերցմամբ ընդունեց օտարերկրյա գործակալների մասին օրենքի նախագծի առաջին տարբերակը։ Դրանից հետո Թբիլիսիում զանգվածային ցույցեր սկսվեցին, որոնք ցրելու համար ոստիկանները նույնիսկ արցունքաբեր գազ ու ջրցան մեքենաներ կիրառեցին։ Մարտի 9-ին հայտնի դարձավ, որ օրինագիծը հետ է կանչվել խորհրդարանից։
Օրինագծի ընդունման դեմ կտրուկ դեմ են արտահայտվել Վրաստանի ընդդիմությունը, երկրի նախագահը, ԱՄՆ-ի Պետդեպը, Եվրամիության արտաքին քաղաքական գերատեսչությունը, Վրաստանում ՄԱԿ-ի ներկայացուցչությունը, Եվրոպայի խորհրդի մարդու իրավունքների հանձնակատարը։