Հայկական պետական մանկավարժական համալսարանի ռեկտորի պաշտոնակատար Սրբուհի Գևորգյանը հավաստագրեր հանձնեց օտար լեզվի (անգլերենի) վերապատրաստման դասընթացի մասնակիցներին: Այս մասին հայտնում են ՀՊՄՀ-ից։
Ա2 — Բ1 մակարդակում 60 ժամ տևողությամբ դասընթացն անցկացվել է 2021թվականի նոյեմբերի 18–ից ընթացիկ տարվա հունվարի 7-ը: Բուհի Գիտահետազոտական կենտրոնի կազմակերպած վերապատրաստմանը մասնակցել է մրցույթի արդյունքում օտար լեզվից 90-100 միավոր ստացած 13 դասախոս:
Գործնական կարողությունների ձեռքբերման նպատակով՝ դասընթացն անցկացվել է առկա ձևաչափով, կիրառվել են ինտերակտիվ մեթոդներ:
«Բուհի պրոֆեսորադասախոսական կազմի օտար լեզվի իմացությունը ցանկալի մակարդակի վրա չէ, այնինչ բուհական մրցակցությունն ու միջազգային գործընթացները ստիպում են վերանայել այն: Մանկավարժությունն այլևս սոսկ տեսական դասընթաց չէ, այլ կոնկրետ բաղադրիչների, այդ թվում՝ լեզվական իմացությանը տիրապետելու կարողություն: Հայաստանյան որևէ բուհ չի կազմակերպում նման անվճար դասընթաց. վերապատրասման այս գործընթացը միտված է լրացնելու այդ բացը և կլինի շարունակական»,-նշեց ռեկտորի պաշտոնակատար Սրբուհի Գևորգյանը:
Վերջինս նկատեց՝ ծրագրի արդյունավետության մասին կխոսեն, երբ ձեռք բերված գիտելիքները ծառայեն իրենց նպատակին՝ մասնագիտական գործընթացներում, միջազգային ծրագրերին մասնակցելու, մասնագիտական գրականության և ուսանողների հետ աշխատանքում:
Ռեկտորը հորդորեց դասընթացի արդյունավետության, որակական փոփոխություններ ունենալու և զարգացնելու համար նշել ծրագրի բացթողումները:
Ուսումնագիտական գծով պրոռեկտոր Մարիամ Իսպիրյանը շնորհակալություն հայտնեց դասընթացին ակտիվ և հետևողական մասնակցության համար՝ նկատելով, որ բուհը դեռևս 2011 թվականից իրականացնում է վերապատրաստման գործընթաց՝ տարբեր ուղղություններով:
Վերապատրաստող, ռոմանագերմանական լեզուների և դրանց դասավանդման մեթոդիկայի ամբիոնի դոցենտ, մանկավարժական գիտությունների թեկնածու Սուսաննա Բաղդասարյանը գոհ է դասընթացի արդյունքից՝ մասնակիցները հանձնել են քննություն և հաղթահարել անցողիկ շեմը՝ ստանալով դրական գնահատական:
Վերապատրաստման արդյունավետության, ծրագրի հագեցվածության և լեզվի իմացության բարելավման մասին խոսում են նաև իրենք՝ վերապատրաստվողները.չեն թաքցնում, որ դասերին մոտեցել են աշակերտի պատասխանատվությամբ:
Վերջիններս նկատում են՝ վերապատրաստումն առավելապես կծառայի իր նպատակին, եթե դասընթացը լինի երկարաժամկետ, իսկ հիմնարար գիտելիքների ստուգման համար առաջակում են որոշ ժամանակ անց կրկնել քննությունը:
Ռեկտորի պաշտոնակատար Սրբուհի Գևորգյանն հույս հայտնեց, որ օտար լեզվի պիլոտային այս դասընթացը յուրատեսակ ֆիլտր կլինի հետագա գործընթացների պատշաճ կազմակերպման համար, իսկ լեզվի իմացությունը բուհում կդառնա կենսակերպ:
