ԳլխավորԼուր

Խաղաղության կորպուսի կամավորներն առցանց կիրականացնեն անգլերենի դասավանդման և STEM մտածողության ծրագրեր

Ամերիկայի Խաղաղության կորպուսը, համագործակցելով Կրթության, գիտության, մշակույթի և սպորտի նախարարության հետ, տարիներ շարունակ իրականացրել է անգլերենի դասավանդման և համայնքային միջմշակութային ծրագրեր։ Կորոնավիրուսի համավարակով պայմանավորված՝ Խաղաղության կորպուսի կամավորները ստիպված դադարեցրել էին աշխատանքները, սակայն կորպուսի ներդրած պիլոտային ծրագրի շրջանակում դրանք կվերսկսվեն: Կամավորներն ավելի քան 100 երիտասարդի համար կկազմակերպեն և կիրականացնեն «Անգլերենի՝ որպես օտար լեզվի դասավանդման» և «STEM» մտածողության (Գիտություն, տեխնոլոգիա, ճարտարապետություն (ինժեներություն), մաթեմատիկա) ծրագրերը։

Ծրագրի բացման առթիվ կազմակերպված առցանց հանդիպմանը ողջույնի խոսքով ելույթ ունեցավ նաև Կրթության, գիտության, մշակույթի և սպորտի նախարարի տեղակալ Արթուր Մարտիրոսյանը։ Նա նախ անդրադարձավ Խաղաղության կորպուսի հայաստանյան գործունեության նախապատմությանը՝ հիշեցնելով, որ կորպուսի առաջին կամավորները Հայաստան են ժամանել 1992 թվականին՝ Հայաստանի համար առավել բարդ շրջանում՝ պայմանավորված Արցախյան ազատագրական պատերազմով և 1988 թ. երկրաշարժի հասցրած ծանր վնասներով: Նախարարի տեղակալն ընդգծեց՝ այդ ժամանակից ի վեր շուրջ 1100 կամավորներ աշխատել են Խաղաղության կորպուսի հայաստանյան ծրագրերում:

Ա․ Մարտիրոսյանը շեշտեց, որ այժմ էլ Հայաստանը բախվում է մի շարք փորձությունների՝ համավարակով և վերջին պատերազմի հետևանքներով պայմանավորված, սակայն այդ մարտահրավերներին դիմակայելու համար ունենք գործընկերներ, և նրանցից մեկն էլ Խաղաղության կորպուսն է։

«Մեր ժողովուրդների միջև պատմական հաղորդակցության մեծ փորձառություն կա դեռևս Հայոց ցեղասպանության ծանր օրերից: Ամերիկյան ժողովուրդը պիոներ է աշխարհում մարդասիրության տարածման և հումանիտար աջակցության տրամադրման առումով, ինչի համար մենք շնորհակալ ենք Կորպուսին»,- ընդգծել է ԿԳՄՍ նախարարի տեղակալը։

Ա. Մարտիրոսյանը բարձր գնահատեց վիրտուալ ծառայության պիլոտային ծրագրի դերը՝ փաստելով, որ միջմշակութային հաղորդակցության ձևավորումը և STEM ծրագրի ներդրումը ԿԳՄՍ նախարարության առաջնահերթություններից են։

Եզրափակելով ելույթը՝ փոխնախարարը բարի երթ մաղթեց ծրագրի մեկնարկին և հույս հայտնեց, որ համավարակի հաղթահարումը կամավորներին հնարավորություն կտա վերադառնալ Հայաստան և ֆիզիկապես ներկա լինել դասընթացներին։ Ըստ Ա. Մարտիրոսյանի՝ թեև կան տեխնոլոգիական հնարավորություններ, սակայն մարդկային շփումն ու փոխանցված արժեքները ոչնչի հետ հնարավոր չէ փոխել։

Տեղեկացնենք, որ պիլոտային առցանց ծրագրի շրջանակում մասնակիցները կաշխատեն Երևանի պետական համալսարանի անգլերենի միջմշակութային հաղորդակցության ամբիոնի ուսանողների և դասախոսների հետ` անգլերենի իմացությունը զարգացնելու և լեզվի միջոցով մշակութային տարբերություններն ուսումնասիրելու համար: Այս նախագիծը, որին կմասնակցեն բակալավրիատի 80 ուսանողներ, անմիջականորեն կապված է Խաղաղության կորպուսի TEFL (Teaching English as foreign language) ծրագրի նպատակների հետ, որը զարգացնում է Հայաստանի դպրոցներում անգլերեն դասավանդող ուսուցիչների կարողությունները:

Ինչ վերաբերում է «STEM» ծրագրին, ապա դրան կմասնակցեն ավագ դպրոցների շուրջ 35 աշակերտներ: Այն միտված է STEM ոլորտների մասնագիտությունների նկատմամբ հետաքրքրության զարգացմանը՝ միաժամանակ ամրապնդելով հետազոտություն կատարելու, գրելու և ստեղծագործական մտածողության հմտությունները:

Comment here