ԱրՊՀ հանրակացարանում 2022-2023 ուստարում բնակվելու համար դիմում ներկայացրած 63 ուսանողներից օգոստոսի 30-ի դրությամբ սենյակներով ապահովվել են 60 ուսանողներ, ովքեր սովորում են ԱրՊՀ-ում և այլ ուսումնական հաստատություններում: Այս մասին տեղեկացրել է ԱրՊՀ վարչական աշխատանքների գծով պրոռեկտոր Ռուսլան Ավետիսյանը:
Նրա խոսքով` հանրակացարանում բնակվել ցանկացող ուսանողների կեցության հետ կապված աշխատանքներն իրականացնելու նպատակով ստեղծվել է հանձնաժողով, որի կազմում են ԱրՊՀ ՎԱԳ պրոռեկտոր Ռուսլան Ավետիսյանը, ՈՒՀՏԱ և Կ բաժնի աշխատակից Լիլիթ Մարգարյանը, ավագ հաշվապահ Լուսինե Աբրահամյանը, հանրակացարանի պարետ Անահիտ Հայրիյանը:
Ներկայացած 60 ուսանողներին հատկացվել են սենյակներ` առաջնահերթության կարգով ապահովելով զոհված կամ անհայտ կորած զինծառայողների զավակներին, միակողմանի կամ երկկողմանի ծնողազուրկ, հաշմանդամություն ունեցող, տեղահանված ուսանողներին, ապա` մյուսներին: Ինչպես նշեց Ռ. Ավետիսյանը` գործընթացն անցել է բնականոն հունով, ոչ մի արտառոց դեպք չի արձանագրվել:
Հանրակացարանում բնակվելու համար դիմած, բայց չներկայացած ուսանողները առաջիկայում կարող են դիմել հանրակացարանի պարետին։
