ԳլխավորԼուր

Համերգներ, երթեր, օրհնության կարգ… Սուրբ Սարգսի տոնի միջոցառումների ցանկը

Սիրո բարեխոս Սուրբ Սարգիս զորավարի, նրա Մարտիրոս որդու և 14 զինվորների տոնն այս տարի կնշվի փետրվարի 8-ին: Հայ առաքելական եկեղեցու Արարատյան հայրապետական թեմը ներկայացրել է տոնական միջոցառումների ցանկը:

Նավասարդ Սրբազանի տնօրինությամբ փետրվարի 8-ին թեմի երեք՝ Ս. Սարգիս անունը կրող եկեղեցիները (Առաջնորդանիստ, Նոր Նորքի և Արգավանդի) բաց կլինեն մինչև երեկոյան ժամը 22.00-ը: Այս տարի տոնական միջոցառումների շարքում ընդգրկված են հետևյալ ծրագրերը.

Փետրվարի 7

11.30- «Թե կան դասեր, կա նաև սեր». երիտասարդների տոն  Հովհ. Թումանյանի թանգարանում
Երիտասարդական ակումբների դաշնությունը, Հայ Եկեղեցու համաշխարհային երիտասարդական միավորումը Հովհ. Թումանյանի անվան թանգարանում երիտասարդների համար գեղեցիկ միջոցառում են կազմակերպում՝ մեծ երախտավորի առաջին բանաստեղծությունից վերցված գեղեցիկ տողերի կարգախոսով: Ի դեպ՝ այդ օրը սեր խոստովանող և այդ սերն ընդունող զույգերի համար անակնկալներ են նախատեսված:

15:00-20.00«Իմ գաղտնի Գրքասեր. Սիրո խոստովանություն գրքով»: «Բուկինիստ» գրախանութների ցանցը և Արարատյան Հայրապետական թեմը սիրահարների տոնի առթիվ ներկայացնում են «Իմ գաղտնի գրքաՍԵՐ. սիրո խոստովանություն գրքով» միջոցառում-ակցիան: Փետրվարի 7-ին՝ ժամը 15:00-ին, «Բուկինիստի» «Աբովյան» մասնաճյուղում (Աբովյան 2/5) կմեկնարկի «Իմ գաղտնի գրքասեր» ծրագրի մասնակիցների գրքերի հանձնումը: Չբացահայտելով նվիրողի անձը՝ միջոցառմանը հրավիրվելու են բոլոր նրանք, ովքեր նվերներ ունեն իրենց գաղտնի գրքասերներից:

16.00Նախատոնական համերգ։ ԱՀԹ առաջնորդանիստ Ս. Սարգիս եկեղեցու բակում Երևանի Կենտրոն վարչական շրջանի Մշակույթի բաժնի նախաձեռնությամբ կկազմակերպվի նախատոնական համերգ՝ նվիրված Ս. Սարգսի տոնին: Ելույթ կունենա «Վերադարձ» երգի-պարի ազգագրական խումբը: Եկեղեցի այցելած երիտասարդներին կբաժանվեն աղաբլիթներ:

16.30- Զրույց Սուրբ Սարգսի մասին: Երիտասարդների և սիրո բարեխոս Սուրբ Սարգսի տոնին ընդառաջ՝ «Ժողովրդական արվեստի հանգույց» հիմնադրամում, արդեն ավանդույթ դարձած բանախոսությունների շրջանակում Մետաքսի Ճանապարհ Հյուրանոցի դահլիճում տեղի կունենա զրույց Ս. Սարգիս զորավարի մասին: Զրույցը կվարի ԱՀԹ տեղեկատվական բաժնի հոգևոր համակարգող Տեր Եսայի քահանա Արթենյանը:  Դասախոսության ավարտին բոլոր ներկաներին կբաժանվեն աղի բլիթներ:

17:00-19:00. Հսկման ժամերգություն։ Արարատյան  Հայրապետական թեմի Նոր Նորքի Ս. Սարգիս եկեղեցում տեղի կունենա հսկման ժամերգություն, այցելու երիտասարդներին կբաժանվեն աղաբլիթներ: Կկատարվի երիտասարդների օրհնության կարգ:

19.00Երիտասարդական երեկո Լոֆթում. տոնում են Ս. Սարգսի տոնը
Լոֆթի և «Կէան» կրթամշակութային կենտրոնի համագործակցությամբ Երևանի ամենաերիտսարդական անկյունում կներկայացվեն Սուրբ Սարգսի տոնի ազգագրական ծեսերն ու խորհուրդը: Մասնակիցների համար ազգագրական խաղ կկազմակերպվի, իսկ խոհանոցում փոխինձ ու աղի բլիթ կպատրաստեն:

Փետրվարի 8-ին

Երիտասարդների օրհնության կարգ կկատարվի բոլոր եկեղեցիներում

9:30-ին Ավետարանը կբերվի եկեղեցի: Երևանի Մ. Մաշտոցի անվան հին ձեռագրերի գիտահետազոտական ինստիտուտ Մատենադարանից 17-րդ դարում Ս. Սարգիս եկեղեցում ընդօրինակված Ավետարանը կբերվի առաջնորդանիստ Ս. Սարգիս եկեղեցի, Ս. Պատարագի ողջ ընթացքում կլինի Ս. Խորանի վրա: Ավետարանը եկեղեցում կմնա մինչև երեկոյան ժամերգությունը:

10:00-ին Ս. Սարգսի աջը կբերվի եկեղեցի: Ն.Ս.Օ.Տ.Տ. Գարեգին Բ Ամենայն Հայոց Հայրապետի օրհնությամբ Ս. Սարգսի աջը կբերվի Առաջնորդանիստ Ս. Սարգիս եկեղեցի: Հավարտ Ս. Պատարագի Սրբազան հայրը սուրբ մասունքով կօրհնի հավատավոր ժողովրդին ու զինվորներին: Ս. Աջը եկեղեցում կմնա մինչև երեկոյան ժամերգությունը:

11.00. Տոնական Ս. Պատարագ՝ նվիրված Ս. Սարգիս զորավարի, նրա Մարտիրոս որդու և 14 զինվորների հիշատակին:

Տոնի առթիվ Ս. Պատարագ է մատուցվելու Ս. Սարգսի անունը կրող ԱՀԹ-ի չորս՝ առաջնորդանիստ, Նոր Նորքի, Արգավանդի, Ոստանի (խոնարհված) եկեղեցիներում: Առաջնորդանիստ Ս. Սարգիս եկեղեցում այն կմատուցվի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի հանդիսապետությամբ:

14.30. Խաչերթ: Արդեն ձևավորված ավանդույթով Արարատյան Հայրապետական թեմի երիտասարդների նախաձեռնությամբ առաջնորդանիստ Ս. Սարգիս եկեղեցուց Մաշտոց և Բաղրամյան պողոտաներով հազարավոր երիտասարդներ, եկեղեցական համայնքների անդամներ, զինվորականներ, հասարակական կազմակերպությունների անդամներ, բուհերի ուսանողներ և բոլոր ցանկացողները միասնաբար կմասնակցեն խաչերթին:

14.30 – «Ս. Սարգիս» ցուցահանդես- մրցույթ: Հայաստանի նկարիչների տանը (Աբովյան 16) կբացվի Ս. Սարգսի տոնին նվիրված հանրապետական երիտասարդական 7-րդ ցուցահանդես-մրցույթը: Կազմակերպիչներն են Արարատյան Հայրապետական թեմը, Աշխարհի հայ նկարիչների միությունը և Հայաստանի նկարիչների միությունը: Մրցույթի համար սահմանվել է չորս անվանակարգ՝ գեղանկար, գրաֆիկա, քանդակ, դեկորատիվ-կիրառական արվեստ: Մրցույթին մասնակցում են մինչև 35 տարեկան նկարիչները: Լավագույն աշխատանքները կարժանանան դրամական պարգևների:

15.30- Տոնական համերգ Սիրահարների պուրակում: Ելույթ կունենան սիրված երգիչներ Մարտին Մկրտչյանը, Մրոն, Սիլվա Հակոբյանը, Աննա Խաչատրյանը, Ալլա Լեւոնյանը, Ռուբեն Սասունցին ու Վարդան Բադալյանը։ Համերգի երկրորդ մասը ազգային երգուպարով մեծ տոնախմբության կվերածի «Մասունք» ավանդական երգի պարի համույթը։

Զինվորների օրհնության կարգ առաջնորդանիստ Ս. Սարգիս եկեղեցում Տ. Նավասարդ արքեպիսկոպոս Կճոյանի նախագահությամբ:

12.30. Խաչերթ Վ.Սարգսյանի անվան ռազմական ինստիտուտից դեպի Նոր Նորքի Սուրբ Սարգիս եկեղեցի: Ռազմական ինստիտուտի թմբկահարների ուղեկցությամբ՝ խաչերթին կմասնակցեն եկեղեցու համայնքի անդամները, ռազմական ինստիտուտի սաները: Եկեղեցու բակում կկատարվի երիտասարդների օրհնության կարգ: Ավարտին տեղի կունանա համերգ՝ Մայր Աթոռ Սուրբ Էջմիածնի և ՀԲԸՄ Նոր Նորքի Հայորդաց տան գեղ. խմբերի մասնակցությամբ: Նվերներ կբաժանվեն նախորդ տարվա ընթացքում Նորքի Ս. Սարգիս եկեղեցում մկրտված, նշանադրված, պսակադրված Սարգիս անունով երիտասարդներին

Comment here