«Ալաշկերտը» հաղթեց «Կայրաթին» ու դուրս եկավ փլեյօֆֆ

Եվրոպայի լիգայի 3-րդ որակավորման փուլի պատասխան խաղում «Ալաշկերտը» ընդունել էր ղազախական «Կայրաթին»։

Հանդիպման հաշիվը բացվեց 43-րդ րոպեին․ մեր թիմի կազմում աչքի ընկավ Ժոզե Էմբալոն, սակայն առաջին կեսին ավելացված առաջին րոպեին մրցակցի կազմում հաշիվը հավասարեցրեց Աիբոլ Աբիկենը։

Երկրորդ կեսի սկզբնամասում՝ 50-րդ րոպեին Էմբալոն «Ալաշկերտին» առաջ մղեց հաշվի մեջ՝ դառնալով դուբլի հեղինակ։

61-րդ րոպեին տուգանայինի խաղարկումից հետո մրցակցի կազմում հաշիվը հավասարեցրեց Արթուր Շուշենաչևը։

1 րոպե անց Դենիս Պոլյակովը կանոնների կոպիտ խախտում թույլ տվեց Արտակ Գրիգորյանի հետ պայքարում ու ուղիղ կարմիր քարտով հեռացվեց խաղադաշտից։

Խաղի հիմնական ժամանակն ավարտվեց 2-2 հաշվով։ Լրացուցիչ ժամանակի 13-րդ րոպեին Ալեքսանդր Գլիշիչն առաջ մղեց «Ալաշկերտին»՝ 3:2։

Տեղեկացնենք, որ 3-րդ որակավորման փուլի առաջին խաղն ավարտվել էր ոչ-ոքի արդյունքով։

«Ալաշկերտը» Եվրոպայի լիգայի փլեյօֆֆում մրցելու է շոտլանդական «Գլազգո ռենջերս»-ի հետ։ Առաջին հանդիպումը կկայանա մեկ շաբաթ անց։