«Տավուշը հանուն հայրենիքի» շարժման կողմնակիցները գիշերել են Երևանի Բաղրամյան պողոտայում՝ Ազգային ժողովի շենքի դիմաց, որտեղ վրաններ են տեղադրել։
Տեղեկացնենք, որ հունիսի 9-ին Հանրապետության հրապարակում կայացած հանրահավաքից հետո ցուցարարները երթով շարժվեցին դեպի Բաղրամյան պողոտա, որտեղից նրանց ուժայինները չթողեցին գնալ Դեմիրճյան փողոցով, պատճառաբանելով, որ պետք է ապահովեն ԱԺ-ի բնականոն աշխատանքը։
Իսկ հանրահավաքի ժամանակ «Տավուշը հանուն հայրենիքի» շարժման առաջնորդ, վարչապետի թեկնածու Բագրատ սրբազանը հայտարարեց, որ առաջիկա 4 օրվա ընթացքում՝ 96 ժամ անընդհատ առանց ընդմիջման բողոքի ակցիաներ պիտի իրականացնեն, մինչև հասնեն իրենց պահանջի իրականացմանը` ՀՀ վարչապետի և կառավարության հրաժարականին։ Սրբազանը հորդորեց Ազգային ժողովի ընդդիմադիր պատգամավորներին հունիսի 11 -ին նախաձեռնել նիստ` կառավարության հրաժարականի օրակարգով։
Մայիսի 4-ին Տավուշի մարզի Կիրանց գյուղից դեպի Երևան մեկնարկել է «Տավուշը հանուն հայրենիքի» շարժման երթը, որը առաջնորդում է Բագրատ արքեպիսկոպոս Գալստանյանը:
Երթի մասնակիցները Երևան հասան մայիսի 9-ին, որտեղ բազմամարդ հանրահավաքի ժամանակ Բագրատ սրբազանը հայտարարեց, որ պահանջում են վարչապետ Նիկոլ Փաշինյանի հրաժարականը։
Մայիսի 10-ից մեկնարկեցին անհնազանդության ակցիաները։
Մայիսի 26-ի հանրահավաքում հայտարարվեց, որ շարժման՝ վարչապետի թեկնածուն Բագրատ սրբազանն է։ Դրանից հետո նա կոչ արեց շարունակել անհնազանդության խաղաղ ակցիաները։