Հայաստանի ազգային գրադարանը ներկայացրել է հունիսին ամենապահանջված գեղարվեստական գրքերի տասնյակը՝ հիմնված ընթերցողների սպասարկման վիճակագրության վրա։ Այս ցանկը ոչ միայն արտացոլում է ընթերցողական հետաքրքրությունները, այլև մեկտեղում է տարբեր ժամանակների ու գրական ուղղությունների այնպիսի ստեղծագործություններ, որոնք շարունակում են գտնել նոր ընթերցողներ։
Ալեքսանդր Պուշկին-«Փոքրիկ ողբերգություններ» (36 սպասարկում)
Ռուս դասականի փիլիսոփայական դրամաները բացահայտում են մարդու կրքերի, իշխանության, փառասիրության և խղճի հավերժական բախումները։
Թենեսի Ուիլյամս-«Ցանկություն անունով տրամվայը․ Դաջված վարդը․ Իգուանի գիշերը»
Հոգեբանական խորությամբ այս պիեսները ներկայացնում են մարդկային փխրունությունը, սիրո, մենության և արժանապատվության պայքարը։
Վարդգես Պետրոսյան-«Վերջին ուսուցիչը»
Հայ իրականության ֆոնին հեղինակը պատմում է մտավորականի պատասխանատվության, արժանապատվության և ժամանակի փոփոխությունների մասին։
Էռնեստ Հեմինգուեյ-«Եվ ծագում է արևը (Ֆիեստա)»
«Կորուսյալ սերնդի» խորհրդանշական վեպը պատերազմի հետևանքներն ու կյանքի իմաստի որոնումն է ներկայացնում երիտասարդների ճակատագրերի միջոցով։
Հերման Հեսսե-«Սիդհարթա»
Արևելյան իմաստությամբ ներշնչված այս վիպակը մարդու ինքնաճանաչման և հոգևոր կատարելության որոնման պատմությունն է։
Մարիո Պյուզո-«Կնքահայրը»
Ընտանիքի, իշխանության և հավատարմության մասին համաշխարհային բեսթսելերը բացահայտում է մաֆիայի ներքին աշխարհն ու նրա օրենքները։
Էրիխ Մարիա Ռեմարկ-«Երկինքն ընտրյալներ չունի»
Սիրո և կյանքի անցողիկության մասին հուզիչ վեպ, որտեղ յուրաքանչյուր պահ ձեռք է բերում առանձնահատուկ արժեք։
Ագաթա Քրիստի-«Անվերջանալի գիշեր»
Սպասելի ավարտից հեռու այս հոգեբանական դետեկտիվը մինչև վերջին էջը պահում է լարվածությունն ու անակնկալը։
Օրհան Փամուք-«Իմ անունը կարմիր է»
Արևելքի և Արևմուտքի մշակութային բախման ֆոնին կառուցված վեպ, որտեղ արվեստը, սերը և սպանությունը միահյուսվում են մեկ պատմության մեջ։
Գուրգեն Խանջյան-«Համբերություն քեզ, մա՛րդ»
Ժամանակակից հայ արձակի այս ստեղծագործությունը մարդկային տոկունության, ներքին պայքարի և հույսը չկորցնելու մասին է։
Մեր տելեգրամյան ալիքը՝ t.me/usanoghnews
