Հայտնի են «Մանկական Եվրատեսիլի» բացման հաղորդավարները

Հայտնի են «Մանկական Եվրատեսիլ- 2022» միջազգային երգի մրցույթի բացման արարողության հաղորդավարները, տեղեկանում ենք  «Մանկական Եվրատեսիլի» պաշտոնական կայքից։

Հանդիսությունը կվարեն  «Մանկական Եվրատեսիլում 2011»-ում Հայաստանը ներկայացրած Դալիթան, «Եվրատեսիլ 2014»-ում Հայաստանը ներկայացրած Արամ Mp3-ն և հաղորդավար Համլետ Առաքելյանը:

Երևան են ժամանելու մրցույթի տարբեր տարիների հաղթողները, որոնք ելույթ են ունենալու դեկտեմբերի 5-ին Հանրապետության հրապարակում՝ երգի մրցույթի հանդիսավոր բացման ժամանակ։ Նույն օրը կվառվեն քաղաքի գլխավոր տոնածառի լույսերը։

Այդ օրը ելույթ կունենան նաև «Եվրատեսիլ 2022»-ի հայաստանյան պատվիրակ Ռոզա Լինը և «Մանկական Եվրատեսիլ 2021–ի» հաղթող, Հայաստանի ներկայացուցիչ Մալենան:

Նույն օրը մրցույթի 16 մասնակիցները Հայաստանի ազգային պատկերասրահում մասնակցելու են վիճակահանությանը. որոշվելու է, թե ինչ հերթականությամբ ելույթ կունենան նրանք։

Հիշեցնենք, որ «Մանկական Եվրատեսիլ-2022» երգի մրցույթը տեղի կունենա դեկտեմբերի 11-ին, Կարեն Դեմիրճյանի անվան մարզահամերգային համալիրում:

Հայաստանը կներկայացնի 14-ամյա Նարե Ղազարյանը «DANCE» երգով։

Երգի մրցույթը կվարեն երգչուհի Իվետա Մուկուչյանը, հաղորդավար, երաժիշտ Գարիկ Պապոյանը, նույն մրցույթին Լեհաստանում Հայաստանը ներկայացրած Կարինա Իգնատյանն ու ռոբոտ Ռոբինը։